Shefi i politikës së jashtme të BE-së, Josep Borrell, ka paralajmëruar Bjellorusinë për lejimin e Rusisë që të vendosë armë taktike bërthamore në territorin e saj.
“Bjellorusia që pret armë bërthamore ruse do të nënkuptonte një përshkallëzim të papërgjegjshëm dhe kërcënim për sigurinë evropiane. Bjellorusia ende mund ta ndalojë atë, është zgjedhja e tyre. BE është e gatshme të përgjigjet me sanksione të mëtejshëm”, Borrell shkroi në Twitter.
Në një intervistë të shtunën, presidenti rus Vladimir Putin tha se kjo iniciativë nisi nga vendimi i Britanisë javën e kaluar për t’i dhënë Ukrainës raunde të blinduara që përmbajnë uranium të varfëruar.
Armët bërthamore taktike janë të destinuara për përdorim në fushën e betejës. Ato kanë një rreze të shkurtër dhe një rendiment të ulët në krahasim me kokat bërthamore shumë më të fuqishme të pajisura me raketa me rreze të gjatë.
Zëdhënësja e NATO-s Oana Lungesku, e quajti atë “të rrezikshëm dhe të papërgjegjshëm”.
Shtetet e Bashkuara thonë se nuk ka asnjë indikacion që Rusia ka lëvizur armët bërthamore përtej kufirit të saj.
“Ne nuk kemi parë asnjë arsye për të rregulluar qëndrimin tonë strategjik bërthamor”, tha Departamenti i Mbrojtjes i ShBA-së në një deklaratë.
Të dielën, Ukraina bëri thirrje për një takim urgjent të Këshillit të Sigurimit të OKB-së, me sekretarin e Këshillit të Sigurimit të Ukrainës, Oleksiy Danilov, duke thënë se Kremlini e kishte marrë Bjellorusinë “peng bërthamor”.
Është një “hap drejt destabilizimit të brendshëm të vendit,” shtoi ai.
Putin tha se Rusia planifikon të mbajë kontrollin mbi armët bërthamore që dërgon në Bjellorusi, me ndërtimin e objekteve të magazinimit që do të përfundojë deri më 1 korrik.
Ai nuk tha se sa armë bërthamore do të mbante Rusia në Bjellorusi, e cila ndan një kufi të gjatë me Ukrainën dhe anëtarët e NATO-s, Poloninë, Lituaninë dhe Letoninë.
Qeveria amerikane beson se Rusia ka rreth 2000 armë bërthamore taktike, duke përfshirë bomba që mund të barten me avionë taktikë, koka luftarake për raketa me rreze të shkurtër dhe raunde artilerie.
Putin argumentoi se duke vendosur armët e saj taktike bërthamore në Bjellorusi, Rusia po ndiqte shembullin e Shteteve të Bashkuara, duke vënë në dukje se vendi ka armë bërthamore në Belgjikë, Gjermani, Itali, Holandë dhe Turqi.
“Ne po bëjmë atë që ata kanë bërë për dekada, duke i stacionuar në disa vende aleate, duke përgatitur platformat e nisjes dhe duke trajnuar ekuipazhet e tyre”, tha Putin, duke folur në një intervistë në televizionin shtetëror që u transmetua të shtunën mbrëma. Udhëheqësi rus pretendoi se masa nuk do të shkelte marrëveshjet ekzistuese të mospërhapjes bërthamore.
