Policia e Tiranës ka bërë të ditur se ka goditur 5 raste të ushtrimit të aktiviteteve të lojërave të fatit në mënyrë të jashtëligjshme.
Sipas raportimeve nga policia, janë arrestuar në flagrancë në Tiranë tre shtetas, ndërkohë që janë proceduar penalisht dy të tjerë.
Komunikata e policisë:
“Goditen 5 raste të ushtrimit të kësaj veprimtarie të palejuar, vihen në pranga 3 shtetas, procedohen penalisht dy të tjerë.
Sekuestrohen 4 aparate celulare dhe makineta që shërbejnë për lojëra fati.
Strukturat e DVP Tiranë, në vijim të punës për goditjen e paligjshmërive në fushën e lojërave të fatit, si dhe në bazë të informacioneve të marra në rrugë operative, kanë organizuar kontrolle në lokale dhe ambiente të ndryshme, të cilat mund të vihen në dispozicion për organizimin e lotarive të palejuara dhe kanë goditur 5 raste të kësaj veprimtarie.
Në përfundim të veprimeve hetimore u arrestuan në flagrancë shtetasit:
– D. K., 43 vjeç, pronar i një lokali në rrugën “Tre Dëshmorët”;
– K. V., 20 vjeç, pronar i një lokali në rrugën “Besim Alla”;
-M. Gj., 32 vjeç, pronar i një lokali në rrugën “Muhamet Gjollesha”.
Gjithashtu, u proceduan penalisht shtetasit E. K., 28 vjeç, dhe Xh. K., 22 vjeç.
Gjatë kontrolleve të ushtruara nga shërbimet e Policisë, shtetasit D. K., K. V., M. Gj., dhe E. K., u kapën në flagrancë duke ushtruar aktivitetin e paligjshëm të lojërave të fatit, nëpërmjet basteve sportive, ndërsa gjatë kontrollit të një ambienti në rrugën “Belul Hatibi”, në pronësi të shtetasit Xh. K., u konstatuan makineta që shërbejnë për lojëra fati.
Materialet procedurale i kaluan Prokurorisë, për veprime të mëtejshme”, thekson Policia./kosova.live/
Shpërndaje në
SONDAZH
Loading ...
