Një firmë braziliane e investimeve ka kërkuar që ylli i Paris Saint-Germain, Neymar, të përballet me një dënim me pesë vjet burg, kur ai të dalë në gjyq javën e ardhshme për akuzat për mashtrim dhe korrupsion në lidhje me transferimin e tij në Barcelonë nga Santos në vitin 2013.
DIS, i cili zotëronte 40% të të drejtave të sulmuesit brazilian në atë kohë, argumenton humbjet, sepse tarifa e transferimit ishte e nënvlerësuar.
Neymar, 30 vjeç, i ka mohuar akuzat, por humbi një apel në Gjykatën e Lartë të Spanjës në vitin 2017, duke çuar në gjykim të nisur nga prokurorët spanjollë.
Lojtari i Paris Saint-Germain do të duhet të paraqitet personalisht për ditën e parë të gjyqit në Barcelonë të hënën, tha gjykata, por është e paqartë nëse atij do t’i kërkohet të qëndrojë për të gjithë seancën që mund të zgjasë dy javë.
Të pandehurit e tjerë janë prindërit e Neymar, dy klubet, ish-presidentët e Barcelonës, Josep Maria Bartomeu dhe Sandro Rosell, dhe ish-presidenti i Santos, Odilio Rodrigues.
Rosell gjithashtu ka mohuar më parë çdo gjë.
Në një deklaratë, Baker McKenzie, avokatët që përfaqësojnë familjen Neymar, pretenduan se gjykatat spanjolle “nuk ka juridiksion për të ndjekur penalisht familjen Neymar dhe kompaninë e tyre N&N”, sepse aktet janë kryer nga shtetas brazilianë dhe janë jashtë territorit spanjoll.
Ata gjithashtu theksojnë se krimet e supozuara nuk janë të dënueshme në Brazil.
DIS fitoi një përqindje të të drejtave të Neymarit, kur ai ishte 17 vjeç, në këmbim të 2 milionë eurove.
Barcelona tha se në kohën e lëvizjes së Neymarit, tarifa e transferimit ishte 57.1 milionë euro, nga të cilat 40 milionë euro iu paguan familjes së tij.
Firma e investimeve mori një pjesë prej 40% të 17.1 milionë eurove të mbetura që iu paguan klubit brazilian, Santos.
“Të drejtat e Neymarit nuk i janë shitur ofertuesit më të lartë”, tha avokati i DIS, Paulo Nasser, në një konferencë shtypi në Barcelonë të enjten. “Kishte klube që ofruan deri në 60 milionë euro”.
Përveç kërkesës me pesë vjet burg, DIS po kërkon gjithashtu dënime me burg për Rosell dhe Bartomeu dhe një gjobë prej 149 milionë eurosh.
Prokurorët spanjollë kërkojnë një dënim me dy vjet burg për Neymarin dhe pagesën e një gjobe prej 10 milionë eurosh dhe një dënim pesëvjeçar për Rosellin, plus një gjobë prej 8.4 milionë euro për Barcelonën.
Deklarata e Baker McKenzie shtoi se familja Neymar është akuzuar për “korrupsion midis individëve privatë” që zbatohet për “konkurrencën e produkteve dhe shërbimeve ndërmjet kompanive” ndërsa Neymar “nuk është një shërbim apo një mall”.
Në fund të deklaratës u tha se transferimi nuk kishte thyer asnjë rregull të FIFA-s.
